lunes, 9 de febrero de 2015

Haurtzarora salto eginez

Gaurko klasean, oso gutxitan egiten dugun ekintza burutu dugu, hau da, minutu batzuk hartu ditugu gure haurtzaroko garaiaren inguruan pentsatzeko. Horretarako, denboran atzera jo dugu, noizbait oroimenean galdu genituen ume garaiko oroitzapenetarantz bideak irekiz.

Irakasleak haur hezkuntzan erabiltzen ziren hainbat materialen argazkiak ekarri dizkigu, batzuk besteak baino ezagunagoak. Honako hauek izan dira:



Erregletak: Hauek ezagunak egiten zaizkigu, eta jolas ezberdin asko egiten genituela oroitzen gara. Gehienetan zenbakiekin erlazionatuz eragiketak egiteko erabiltzen genituen, baina kolore eta tamainak kontuan hartuz ere sailkapenak eginez ibiltzen ginen. Gure ustez, egur puska sinple hauek oso aberasgarriak dira, askotariko jolas eta jarduerak burutzeko aukerak ematen baitizkigu.






Mundu bola: Egia esan behar bada, haur hezkuntza garaian mundu bola erabili genuenik ez gara oroitzen, baina bai lehen hezkuntzan. Hala ere baliagarria iruditzen zaigu haurrak pixkanaka-pixkanaka munduaren irudi bat egiten hasteko eta gu geu munduan zehar kokatzeko. Beste alde batetik, lurra eta ura bereizteko ere modu egokia da eta lurraldeen banaketa kolore ezberdinez adierazita egoteak ere gauzak errazten ditu.

Rubio liburuxka
Rubio liburuxka: Liburuxka hauek ezagunagoak egiten zaizkigu taldekide batzuei besteei baino. Idazteko lehen urratsak liburuxka hauekin eman genituen eta horrelaxe ikasi genuen, pixkanaka-pixkanaka punttuei jarraituz motrizitate fina kontrolatzen. Hala ere, liburuxka hauekin lan egitea ez zitzaigun asko gustatzen, oso aspergarriak egiten baitzitzaizkigun. Gainera, bakarka egiten genituela oroitzen gara, bakoitza bere erritmoan jarduten zen eta jarduera hauek burutzeko zailtasunak zituztenak pixkanaka motibazioa galduz joaten zirela iruditzen zaigu, besteak oso aurreratuta ikusten heinean. Hala ere, makina bat liburuxka betetakoak gara, punttutik punttura salto eginez arkatzaren laguntzaz.
Abakoa

Abakoa: Abakoarekin oso ondo gogoratzen garen arren, Lehen Hezkuntzan gehiago erabiltzen genuela oroitzen gara. Batez ere, eragiketak egiteko erabiltzen genituen, hau da, batuketak eta kenketak modu erraz batean. Haur hezkuntzan eragiketak baino gehiago zenbatzeko erabiltzen genituen eta koloreek erraztasuna ematen ziguten.

Puntuen fitxa
Puntuen fitxak: Hauen oroitzapena batez ere bost urteko gelan daukagu, eta Rubio liburuxken antzera, hauek ondo egin arte behin eta berriz egin behar izaten genituen. Horren emaitza gisa, aspermena sortzen zitzaigun, etengabe, behin eta berriz gauza berdina egin behar genuelako.

Gaurko ariketa honekin haurtzaroraino egin dugu salto. Askotan ohartzen ez garen arren, milaka oroitzapen ditugu geure buruan biraka eta hauek azaleratzeko ohiturarik ez dugu. Gaur gure txikitako gorputzean sarturik hauek arrantzatzen saiatu gara eta gure txikitako oroitzapenen bonbardaketa jaso dugu bueltan. Ariketan zehar, lagunen artean gure esperientziak elkarbanatu ditugu barre eta algara artean.

Urteak aurrera egin duten heinean, geure burua haurren lekuan jartzea aberasgarria iruditu zaigu, garai hartako hezkuntza sistema eta irakasleek erabiltzen zituzten materialei buruz hausnartzeko. Gizartea etengabeko aldakuntzan badabil, geuk ere irakasteko materialei arreta eskaini beharko genieke, hauek ere agian beste metodo batzuengandik aldatu beharko liratekelako.


No hay comentarios:

Publicar un comentario